ПСРЛ. Том 12. Летописный сборник, именуемый Патриаршей, или Никоновской летописью. СПб., 1901.

(с.7)

1426. В лето 6934. Того же лета князь велики Витовт Кестутьевич Литовский ходил на Псков ратью со многою силою; с ним была земля Литовская, и Летицкая, и Чежскаа, и Воложьскаа, и Татарове его, а у царя Махметя испроси дверь его.

(с.158)

1475. Того же лета Татарове Казаньстии побили Устюжан на Каме 40 человек, идучи к Тюмени торгом.

(с.202)

Царь же бежа в Орду; и прииде на него Нагайский царь Ивак в Орду взя и его уби.

(с.203)

….а на царя на Ахмата прииде страх от Бога, и побеже никимже гоним от Угры по Литовской земле, по королеве державе, воюа его землю за его измену. Егда же прибежа в Орду, тогда прииде на него царь Ивак Нагайский и Орду взя, а самого безбожнаго царя Ахмата убил шурин его Нагайский мурза Ямгурчей.

(с.218)

1487. В лето 6995. О Казаньском взятии. Тоя же весны, Априля 11, отпустил князь великий Иван Васильевич всеа Русии воевод своих к Казани, князя Данила Дмитриевича Холмъскаго, да князя Александра Васильевича Оболенскаго, да князя Семена Ивановича Ряполовьского, да князя Семена Романовича, в четверок великий; а царя Магмет-Аминя Казанского отпустил князь великий на другой недели по Велице дни в вторник, Априли 24. А пришли воеводы великого князя и с силою под город под Казань месяца Майа в 18 день, въ четверок на пятой недели по Велице дни, и взяша город Казань июля в 9 день, и царя Алегама Казанскаго изымаша с матерью и с его царицею и с двема браты (с.219) и с сестрою, и с его князми, и приведоша их на Москву. Июля же в 20 прииде весть великому князю, что город Казань взяли его воеводы и царя полонили; а пригонил с той вестию князь Федор Хрипун Ряполовской. И князь великий Иван Васильевич всеа Русии царя Махмет-Аминя из своей руки посадил на царство в Казани, а коромолных князей и уланов смертию казнил и иных коромолников; а царя Алегама с царицею послал князь великий в заточение на Белоозеро, в Каргалом.

(с.242)

1496. О Казани. Тоя же весны, Майа, прииде весть к великому князю Ивану Васильевичю от Казанского Царя Магамед-Аминя, что идет на него Шибанский царь Мамук со многою силою, а измену чинят Казанскии казаки Калимет, Урак, Садыр, Агиш. И князь великий послал в Казань к царю Магамед-Аминю в помощь воеводу своего Семена Ивановича Ряполовского с силою, и иных многих детей боряских двора своего, и Понизовных городов детей боряских: Новогордци, Муромци, Костромичи и иных городов мнозия. Князи же Казанскиа предреченныа слышав воевод великого князя, что идут со многою силою, князь Семен Иванович (с.243) Ряполовской, и выбегоша ис Казани к царю Мамуку; царь же Мамук слыша силу многу великого князя в Казани и возвратися во свояси. Царь же Магамед-Аминь Казанский отпустил воеводу великого князя ис Казани князя Семена Ивановича Ряполовского со всею силою к Москве во свояси с Семеня дни, уже бо не чааху прихода Мамукова к Казани. В лето 7005. Не по мнозе же времени сведав царь Мамук Шибанский, что воевода великого князя пошел ис Казани со всею силою назад во свояси, понеже к Казани измена бысть над царем Магамед-Аминем и вести к Мамуку ис Казани присылаху: Мамук же царь вборзе прииде ратию под Казань со многою силою Нагайскою и со князи Казанскими. Царь же Магамед-Амин Казанский блюднен измены от своих князей, и выбежа и с Казани сам и со царицею и со останочными князи своими, и прииде к великому князю на Москву, лета 7005 года, Ноября; князь же великий держа его честне на Москве. А Мамук царь приступи ко граду со многою силою и взя Казань, понеже не бысть ему сопротивника, и князей Казанских, кои изменяли государю своему, Калимети, Урака, Садыри и Агиша з братиею, изымал, а гостей и земских людей всех пограбил. И не по мнозе времени царь Мамук князей Казанских пожаловал, выпустил, и прииде с ними ратию под Арский городок. Арския же князи града своего не здаша, но бишася с ними крепко; и в то время князи Казанские отъехаша от Мамука в Казань и град окрепиша и царя Мамука во град не пустиша; а измену на него возложиша, что их князей имал, а гостей и земских людей грабил… А послаша князи казанскиа Бараш-Сеита к великому князю Ивану Васильевичу на Москву бити челом от них и от всеа земли, чтобы их великий князь пожаловал, а нелюбиа им и вины отдал, что они «изменили государю своему Магамед-Аминю царю, да и тебе великому князю; да и тем бы еси, государь князь великий, нас пожаловал, Магамед-Аминя царя к нам в Казань не посылал, понеже от него было великое насилие и бесчестие кахунам нашим, и за то есмя ему изменили и прочь от него к Мамуку отъехали»….. Слышав же царь Мамук великого князя жалование к князем Казанским и вскоре поиде от Казани в свояси и на пути умре.

(с.249)

1500. Того же лета прииде весть к великому князю от Казанского царя Абдыл-Летифа, (с.250) что на него идет Агалак царевич, Мамуков брат, да с ним Урак князь Казанских князей. Слышавше же то князь великий и послал к Казани в помощь воевод своих князя Федора Ивановича Белскаго да князя Семена Романовича да Юрья Захарьича, со многими людьми. Агалак же и Урак слышав, что идут ни них воеводы великого князя с силою, и побегоша во-свояси, а воеводы великого князя возвратишася к Москве.

(с.253)

О нагаех. Того же лета (1501) приходиша Нагайскиа Татарове Муса-мурза да Ямгурчей-мурза со многими людми под Казань-город на Казанского царя Абдыл-Летифа, Абреимова сына, и стояху под градом три недели, а князя великого воеводы тогда были в Казани у царя князь Михайло Курбьской да князь Петр Лобан Ряполовской с малыми людми. Царь же Казанский повелел около града нарядити острог, и по вся дни, выходя из града, с Нагаи бои творяху, и Божиим наступлением Нагаи вси вскоре отъидоша во свояси.